خزائیں

لوگوں کو بہار کا موسم پسند ہوتا ہے لیکن میری
عادتیں۔۔۔۔۔۔۔۔۔۔۔۔ میری عادتیں تو ہمیشہ سے بڑی
عجیب تھیں ـ مجھے خزاں کا موسم بہت پسند تھا
ـ ہر طرف ایک پر اسرار خاموشی ۔۔۔۔۔۔۔۔۔۔۔۔۔۔۔۔ یخ
بستہ ہواؤں کی شائیں شائیں مجھے ہمیشہ سے
بھاتی تھی ـ سر شام اوور کوٹ پہنے ، گلے میں
مفلر ڈالے میں اکثر لمبی لمبی سڑکوں پر دیر تک
چلتا رہتا ـ میرے گھر سے پندرہ منٹ کے فاصلے پر
ایک بہت خوبصورت پارک تھا ـ پارک کی سبھی
دیواروں کے ساتھ خوبصورت تراشے ہوئے درخت
تھے اور ہر دو تین درختوں کے بعد ایک بینچ لگایا گیا
تھا ـ پارک میں دس پندرہ منٹ چلنے کے بعد میں
ایک درخت کے قریب بنچ پر بیٹھ گیا ـ اور ایک
طائرانہ نظر پارک کے آخری سرے تک ڈالی ـ پارک
میں دور تک سوائے پانچ چھ افراد کے کوئی نہ تھا ـ
سرد ہوا کی خنکی بڑھتے اندھیرے کے ساتھ بڑھتی
ہی چلی جا رہی تھی اور ہوا میرا من پسند نغمہ
گنگنائے چلے جا رہی تھی ـ میرے ذہن میں ایک بار
پھر وہی سوال ابھرا جو اس سے پہلے کئی مرتبہ
سر اٹھا چکا تھا ـ " آخر خزاں کے موسم میں یہ
خاموشی کیوں ہوتی ہے ، ماحول اتنا سوگوار سا
کیوں لگتا ہے ؟ " لیکن کبھی کوئی جواب ہاتھ نہ آیا
ـ اسی لمحے میرے سر پر کھڑے خزاں رسیدہ
درخت سے کچھ خشک ، آوارہ پتے میری جھولی
میں آ گرے ـ اگلے لمحہ ہوا نے اپنی اسی لے میں تان
چھیڑی اور ایک سرد ہوا کا جھونکا ان خشک آوارہ
پتوں کو میری جھولی سے اڑا لے گیا ـ میں نے سر
اٹھا کرایک نظر خزاں رسیدہ درخت کو دیکھا ـ
یکایک میرے ذہن میں ایک خیال آیا ـ کہیں یہ
ماتمی فضا ان باوفا پتوں کی رخصتی کا سوگ تو
نہیں؟ جنہوں نے اپنی زندگی کا ہر ہر سانس
بہاروں کی رنگینیوں کی نذر کر دیا اور شاید انہی
رنگینیوں کی خاطر ہوا ، پیڑ، آفتاب ، اپنےسب
ساتھیوں سے رخصت لے لی ـ ہم انسان بھی تو
کسی پیارے کے بچھڑ جانے پر ماتم کرتے ہیں ـ
صرف ہم ہی تو نہیں ، گھر کے در و دیوار ، وقت
وصال سے کچھ دیر پہلے نزدیک ہی رکھا چائے کا
آدھا کپ ، الماری میں رکھا استری شدہ سوٹ ،
شیلف پہ رکھی کتاب جس کا مطالعہ بھی ادھورا
تھا ۔۔۔۔۔۔۔۔۔۔۔۔۔۔ سبھی تو سوگ کی چادر اوڑھ
لیتے ہیں ۔۔۔۔۔۔۔۔۔۔۔۔۔۔۔۔۔۔۔ تو یہ آفتاب ، یہ برگ و بار
اور یہ ہوا ۔۔۔۔۔۔۔۔۔۔۔۔۔۔۔۔۔۔۔۔ ان کا بھی تو آپس میں
کوئی رشتہ ہوتا ہو گا ۔۔۔۔۔۔۔۔۔۔۔۔۔۔ شاید یہ سب بھی
اپنے ساتھیوں کے بچھڑ جانے پر سوگوار ہوتے
ہیں ۔۔۔۔۔۔۔۔۔۔۔۔۔۔۔۔۔۔۔ اس سے پہلے کہ میری
سوچیں مزید سفر کرتیں ، ہوا کا ایک یخ بستہ
جھونکا مجھ سے ٹکرایا ـ ہوا نے اپنا وہی نغمہ
چھیڑا ـ لیکن یہ کیا؟ وہی گیت جو مجھے کچھ
لمحے پہلے تک دنیا کے سب گیتوں سے زیادہ پسند
تھا ، یک دم کسی بیوہ کے بین سا کیوں لگنے لگا
تھا ؟ جانے کیوں یک دم مجھے سارا ماحول ہی بے
حد اداس اور غمگین سا لگنے لگا
تھا ۔۔۔۔۔۔۔۔۔۔۔۔۔۔۔۔۔۔۔ اداسی جیسے میرے اندر اترنے
لگی تھی اور اس اداسی سے میں اتنا گھبرا گیا کہ
سر پٹ گھر کی طرف دوڑتا چلا
گیا ۔۔۔۔۔۔۔۔۔۔۔۔۔۔۔۔۔۔۔۔ اس دن کے بعد سے میں خزاں
کی ہر شام اپنے بام و در اس خوف سے بند کر لیتا
ہوں کہ مجھ سے اب ہوا کا نوحہ سنا نہیں جاتا
تحریر نورالہدی